ලන්ඩනයේ සිට මුදා හැරෙන ශ්‍රී ලාංකේය කවි සරණිය

අම්මා…………

අම්මා…………

විශේෂඥ වෛද්‍ය ඩබ්.ඒ. සුසන්ත ද සිල්වා
2023-January

දහදුක් වින්දෙ අම්මේ දරුවන් වෙනුවෙන්
දරුවන් නව දෙනෙක් බිහිකර උන් වෙනුවෙන්
ඔබ හිත රිදවුනත් උන්ගේ හැසිරීමෙන්
ඔබ අග රැජිනියයි අප දිවියේ නිතැතින්

දස මාසයක් කුසයේ දරමින් උන්නා
හැම ගැහැටක්ම විඳිමින් මෙලොවට දුන්නා
ලේ කිරි කරල නව දෙනෙකුම රැක දුන්නා
රස ආහර උයා කවමින් කල් ගෙවුනා

කැත කුනු අත ගගා දරුවන් ගැන බැලුවා
ලෙඩ වූ විටදි තුරුලට ගෙන සැනසෙව්වා
අකුරට ගොසින් අප එන තුරු මඟ බැලුවා
අප නහවලා පිරිසිදු කර හැඩ බැලුවා

දරුවන් ලොකු මහත් වී වෙන් වෙලා ගියා
සමහරු ඔබට නොකියාමත් යන්න ගියා
දරු සෙනෙහසින් පිරි ඔබ හද දැවී ගියා
එනමුත් හැම දුකක් දරමින් ඔබ සිටියා

ඔබ ලෙඩ ඇඳේ සිටිනා විට දුටුව ගතේ
දැනුනේ කියා ගන්නට බැරි දුකකි සිතේ
අපගෙන් වෙන්වෙලා යන්නට ගිය මොහොතේ
කඳුලැලි ඉතිරුවා අම්මේ අප දෙනෙතේ

කව් ගී ලියැවුණත් ඔබ ගැන මෙනෙහි කර
කවදාවත් නොහැක පවසා නිමා කර
අප හද පත්ලෙන්ම හැම මොහොතෙම නිතර
පතනෙමු මිදී යන්නට සසරෙන් එතෙර

21.12.2022