මිතුදම නිසා අහිමි වූ ප්‍රථම ප්‍රේමය

රොෂාන්ති විජේසිංහ  -  ඉතාලිය
රොෂාන්ති විජේසිංහ  -  ඉතාලිය
2021-August

සොඳුරු පාසල් කාලයේ යහළුවන්
සිටියත් මා ලඟින්
නොමැති විට ඔබ දැනුන පාළුව
තනිව  විඳගත්තා සිතින්
මිතුරු ඇසුරේ ඔබත් සමගින්
ගෙවුන කාලය සිත් තොසින්
කෙලෙස අමතක කරන්නද මම
තාම අමතක නෑ ඉතින්

ලබාගන්න⁣ට දැනුම අමතර
හවස පන්තියකට  ගියා
ඔයත් සමගින් ගියපු සැම දින
සිතට සතුටක් ඇතිවුනා
හිතේ තිබු ආදරය තව තව
ඔබ කෙරේ මගෙ වැඩිවුනා
මතක් වී අපි යහළුවන් බව අනේ
මුව මගෙ ගොළු වුනා

දවස් ගෙවිලා සොදුරු පාසල්
කාලයත් අපෙ නිමවුනා
යහළුවන් හැම හිතේ සතුටින්
ආදරෙන් වෙන් වී ගියා
හිතේ තිබු ආදරය සඟවා
සිනාවෙන්  මුව සරසලා
වෙන්වුනා මම ඔබෙන් ආයෙත්
දිනක හමුවේයැයි සිතා

එකම බසයේ එකම අසුනේ
එකම ලඟ ඉදගෙන එදා
හිතේ ඇති ආදරය කීමට
බැරුව සිත මගෙ ලතවුනා
ඔබේ හිත තුල තිබුන සෙනෙහස
පැවසුවේ නම් මට එදා
ඔබේ දිවියට අත්වැලක් වී
ඉන්න තිබුනා සෑමදා

කවදා හෝ ඔබ මගේ සෙනෙහස
සොයාගෙන ඒ යැයි සිතා
දින ගණන් කර බලා සිටියා
හදේ පැතුමන් පුරවලා
අතැර ඔබ මා ඇගේ සෙනෙහස
පැතුව බව දැනගත් එදා
දරාගන්නට බැරුව ඒ දුක
කදුළු සැලුවා රැය පුරා.