බක් මහ දීගයට සැරසෙයි පරිසරය
කජු පිරි ලියන් හිනහෙන විට විලිබරය
අඹ තුරු මුඳුන් වල ලේනුන් සැණකෙළිය
මේ බක් මහේ මගෙ හද නම් දුක්බරය

අප්පච්චී බලයි සේයාරුවේ හැඩ
ඉටි මල් දමේ පොට හැඩ කර විඩෙන් විඩ
අතපසු වෙලා බොහොමැයි අපෙ ගෙදර වැඩ
අම්මේ එන්න ඇහැකිද ලැබුණොතින් ඉඩ

දවුල් කුරුඳු හොයමින් ලදු මත දුවලා
රබර් කෝටු මිටි බැඳ හිස මත තියලා
කෙහෙල් කැනක් දුම් මැස්සේ එල්ලාලා
පෙර නුඹ කරපු වැඩ අද මෙනි සිහිවීලා

සාරුවෙ පදම මැද ආස්මී මල් පිපුනේ
කැවුමේ කොණ්ඩෙ කූරෙන් උඩටම ඇදුනේ
කොකිස් හැඩට කහ වී තෙල් මත දිලුනේ
අතිනි නුඹේ අම්මේ සැම හැඩ වැටුනේ

කාසි කැටය අවුරුද්දට පෙර කඩන
අලුත් ඇදුම් කොහොමින් හෝ අරන්දෙන
මකුළු දැල් කඩා ගෙයි එළි වැට තනන
වෙහෙර මහා දේවියනේ අද කොතැන

නැකතට එදා කිරි උතුරා පිසූ බත
බුදුනට පුදා පලමුව නුඹ පැතුවෙ මෙත
කැවිලි පෙවිලි හැඩතල මේසයක් මත
සැවොම එකට සැමරුව අවුරුදුයි හිත

එරබදු අදත් බඩවැටි වල පිපී ඇත
කෝකිල කූජනා දසතෙහි නිමක් නැත
මීනෙන් මේසයට හිරු යන මගක් ඇත
සඳ අප අතැර ගිය කල සැම ඵලක් නැත

නෑ සිය මිතුරො කැන්දා රස බෙදූ හැටි
පංසලෙ පිංබිමේ කුසුමන් පිදූ හැටි
රබන් සුරල් නුඹ තාලෙට වැයූ හැටි
මතකෙට ඇවිත් අප හදවත් පෙලන හැටි

හිස තෙල් ගාන දා කල ආශිර්වාද
කදමලු ලිහී නෑ ගම් මැද රස වාද
බක්මහ අකුණු මැද නොතෙමී නෑවාද
අහමින් හිනාවෙන්නට නුඹ එනවාද

පලවෙනි අවුරුද්ද නුඹ නැතිවම ලබන
තුන් මහ පෙනෙයි බුදු ඉපදුණු මස තියෙන
ඉන්නා තැනක නුඹ යහතින් ඇති කියන
හැඟුමින් වදිමි අම්මේ මගෙ පිං පිරුණ